ما أشبه الليلة بالبارحة ...كل ما افتكر ال18 يوم بتوع الثورة أقول كده ..ما أشبه اليوم بالبارحة ..أيام ما كان الناس فى ميدان التحرير معتصمين بيطالبوا بسقوط النظام كانت الدعاوى كتير اووى ان الناس دى لازم تروح و كفاية كدة و عايزين استقرار و الناس مش لاقية تاكل ...سمعت الكلام ده من ناس كتير قريبين منى و ناس كويسة والهى و فعلاً قلبها على البلد ..و كنت بقعد أفكر مع نفسى و أقول طيب ايه علاقة الأكل بالناس اللى فى التحرير ..ليه الناس مش لاقيه تاكل ...ايه نوع الاستقرار اللى هما عايزينه؟ والهى أنا كمان عايز استقرار و أكيد مكانش هدفى لا أنا و لا غيرى اننا نقعد فى ميدان التحرير فى عز البرد و نسيب بيوتنا من باب التسلية او من اى باب تانى غير اننا فعلاُ كنا عايزين استقرار و هدفنا زينا زى الناس اللى عايزنا تروح –باستثناء مجموعة من المغرضين طبعاً و دول اتعرفوا بعد الثورة و اتعلم عليهم– ان البلد دى تبقى أحسن و بس... المهم الريس مشى و افتكرنا ان كله تمام و ان العجلة حتبدأ تدور بقى و اتفقنا كلنا من بعد ما عصام شرف مسك الوزارة ان المظاهرات لازم تقف و لازم نرجع شغلنا ندى فيه أكتر و نشتغل حكومة و شعب و جيش علشان النهضة و نبنى مصر الجديدة- اكيد مش قصدى هليوبوليس- ...و لكن لأن الحياة مش وردى اوى كده لقينا ايدين عاملاه تخرب فى الثورة و مش بس فى الثورة لأ فى البلد كلها...و خرجنا –احنا كشباب – من المشهد السياسى و رجعنا نتفرج على اللى بيحصل..كنيسة بتتحرق هنا و كنيسة بتتهد هناك..مسيحيين عند ماسبيرو و مسلمين عند مسجد النور ...الشرطة لسه قافشة و الأمن بقى شبه منعدم و كل واحد بيحمى نفسه بنفسه ...سوزان رجعت شوية فكة و طلعت من السجن-اللى هى اصلاً مدخلتوش- ...حسنى كل مصر دلوقتى متأكدة ان مفيش قوة تقدر تزحزه من شرم الشيخ ...حملة هجوم جارح لكل النشطاء السياسين من اول نوارة نجم و شادى حرب و أسماء محفوظ و غيرهم ....الجيش بيتكلم عن ثورة مضادة من غير ما يحاول يجهضها ...الأمور بقت مش مظبوطة ..فى حاجة غلط بتحصل و كل الناس شايفة كده...
المهم طلعت دعاوى لمظاهرات يوم 27 مايو ...و انقسم الناس كالعادة..حبة موافقين و شايفين ان ده ضرورى و حبة برضه بيقولوا استقرار و البلد مش ناقصة و كفاية لحد كده و أنا ليه وجهة نظر تالته بقى ..أنا مع الفريق التانى فى ان البلد مش ناقصة و الاقتصاد حيبوظ و كفاية كده و علشان الأسباب دى كلها أنا شايف ان النزول للشارع يوم 27 مايو حتمى و لابد منه و انا بعتبره فرض عين على كل مصرى قادر....
غريبة؟؟والهى ابداً بالعكس ..احنا فعلاُ عايزين استقرار و فعلاُ كفاية كده تخريب فى البلد و كفاية عدم اهتمام بالقضايا اللى احنا المفروض نهتم بيها فعلاُ ...كفاية صراعات و مشاحنات و محايلة على الأمن علشان يرجع ...كفاية كلام عن الاخوان و السلفيين و البابا و الكنيسة و كاميليا و عبير و كريستين ..خلينا نشوف الانتخابات اللى جاية حنعمل فيها ايه و نختار المرشحين على اى اساس..خلينا ندى فرص لمرشحين الرياسة يعرضوا برامجهم ...خلينا نناقش بموضوعية دستورنا الجديد حيبقى عامل ازاى ..خلينا نحط خطة علشان ننهض بالاقتصاد بدل الولولة عليه فى كل حتة و خلاص...خلينا نبنى بلدنا بقى صح...خلينا نوصل للجيش انه مشكور جداً على وقوفه مع الثورة بس لازم يعرف انه مش ابونا و انه مفيش طاعة مطلقة لحاكم من هنا ورايح.ززو اننا معاه طول ما هو معانا ووقوفه جنب الثورة مش معناها انها بتاعته.....خلينا ننزل يوم الجمعة ( والهى العظيم أجازة رسمى ) يعنى مفيش شغل واقف و مفيش عجلة انتاج مفسية و لا اى كلام من ده..خلينا نثبت للعالم كله اللى يتابع ثورتنا احنا بس-مع العلم ان فى ثورات تانية - ...ان الشعب المصرى موجود و هو اللى حيصنع مصيره و مش حيسمح لثورته انها ترجع لورا و لا لاى حد يخرب بلده...يلا نرجع زى ال18 يوم ...الليبرالى فى ايد اليسارى و المسيحى بيصب مياه للسلفى علشان يتوضا...ياللا نرجع الشعب ايد واحدة و نوصل رسالة لاى حد ان الشعب فوق الجميع و ارادته أوامر تنفذ ...
نصيحة أخيرة : لو كلامى معجبش و قررت انك برضه مش نازل يوم الجمعة ..ارجوك متشتمش الناس اللى نازلين و لا تتريق عليهم لأنهم والهى هم زيك بالضبط عايزين مصلحة البلد و بيحبوها و بيحبوك على فكرة ....
No comments:
Post a Comment