10/22/2014

انت ملحد ؟!! ممكن أنام مع أختك ؟

     من كام يوم كنت باتفرج على التليفزيون و لقيت اعلان عن برنامج من البرامج اللي طالعة موضة جديد بتاعت استضافة اتنين ملحدين و قدامهم شيخ و قسيس يقعدوا يشتموا فيهم و يمرمطوا فيهم و يقنعوهم بان الكتب السماوية سماوية بايات من الكتب دي نفسها! 
ما علينا ..ده مش موضوعنا دلوقتي و لا الكلام ده هدفه اصلا المناقشة في قضية الالحاد أو الدين علشان الموضوع ما ينحرفش ..

الاعلان كان ماشي كما هو متوقع الشيخ بيصرخ في وش العيال و فجأة سمعت جملة غريبة جداً من الشيخ : 

 " أنت لا تؤمن بالأديان ؟ ؟تسمحلي أضاجع أختك ؟؟ " 
زي ما قلت مش موضوعي هو الأديان أو الالحاد انما تعالو نقف شوية عند جملة الشيخ دي لأن فيها كلام  كتير اوي لازم نفهمه ...

اولاً : الشيخ لا يفقه شئ عن أسلوب المناظرات أو المناقشات أو الحوارات لانه حول القضية من ناس لا تؤمن بوجود اله و رسالات سماوية بينما هو بيؤمن و بدل ما يحاول يقنعهم و يقنع المستمعين بوجهة نظره و بقوة حجته قلب الموضوع في اتجاه تاني خالص و هو الجنس 

ثانياً: الجنس هو أول شئ فضيلة الشيخ بيفكر فيه لأنه أول لما تخيل العالم بلا أديان تخيل الجنس ..اول ما تحرر من قيوده فكر في الجنس ...بدل ما يفكر في الشمس و القمر و الليل و النهار و الموت و الرياح و المطر ....ساب كل ده و فكر في الجنس و ده جزء من التشويه الموجود في عقول الناس دي 

ثالثاً : نظرة الشيخ للمرأة واضحة جداً في الجملة دي فهو مش شايفها شخص ليه ارادة حرة اصلاً ..هو شايف انها تبع الولد و حاجة بتاعته فكأنه لو سأله تسمحلي أنام معاها و هو وافق خلاص حينفذ بدون الرجوع للست لأنها مالهاش رأي و مالهاش كلمة و مش بس كده ده شايفها ملهاش لازمة غير الجنس ....فهي مجرد أداة لتنفيذ الجنس و تلاقي الشيخ ده بيخطب في تلاميذه و يقولهم :" الاسلام كرم المرأة "..طيب يا مولانا الاسلام كرم المرأة و انت اهنتها يا عم !! 

المؤكد ان هذا النوع من البرامج طالما بيدار بهذة الطريقة فنتيجته الوحيدة هي زيادة عدد الملحدين و اللا دينيين و خصوصاً في ظل عصر الحريات و الأفكار اللي ليها أجنحة فعلاً ( الانترنت ) و محدش حيقدر يمنعها توصل للناس زي ما قال نور الشريف في دور ابن رشد في فيلم المصير و على فكرة احنا اخر جيل كان بيتقاله  " هو كده  " بيسكت و مش بيرد ...
الجيل الجديد كل أسئلته لازم تتجاوب مفيش حاجة اسمها هو كده ..وحيفضل يسأل و يفكر و أفكاره حتبقى أكثر حرية و انطلاقاً فبلاش بقلى أسلوب هو كده و اسمع الكلام و عيب احنا نعرف أكتر منك و احنا على حق و انت على الباطل ...

يسقط يسقط حكم رجال الدين